أشتاتا أشتوت ..!!

أشتاتا أشتوت ..!!

الشعب المصري يموت فى حاجه اسمها العفاريت وقعدة الحكاوي عن العفاريت والجن .. ولو عاوز تجرب اقعد كده مع أى مجموعة من الناس واحكلهم حكاية عن العفريت اللى طلع لفلانه أو العفريت اللى ساكن فى العمارة الفلانية ومش مخلى حد عارف يسكن فيها ..أو الشقة اللى الاثاث بيترمي منها من الشبابيك ..حتلاقى الناس تندمج معاك وحتلاقى برده كل واحد منهم عنده من هذا النوع حكاية واتنين وعشرة ...والعجيب أن اى حاجه غريبة أو غير مفهومة أو الغموض محيط بيها تلاقى الناس تفكر علطول فى تفسير معفرت ..حتى أنت بص لنفسك كده لو لاقيت مثلا حاجه فى البيت بتتهز وانت قاعد لوحدك بالليل أو سمعت صوت غريب وانت لوحدك بالليل فى البيت عقلك علطول حيتجه نحو العفاريت وياترى مين العفريت اللى فاضي وجاي يقلق منامك بالليل ! ..حتى متعبتش نفسك وتفكرفى ايجاد سبب علمي أو منطقى للى حصل .. أفتكر مرة كنت قاعدة بالليل أمام الكمبيوتر وكان جمبى على المكتب كوباية نسكافية وبعدين وأنا شغالة أكتب مقال زى ده كده لاقيت الكوباية بتتهز ..طبعا فكرت زى كل الناس وقولت (أعوذ بالله من الشيطان الرجيم ) ..بعدين قولت فى نفسي (يخرب عقلك يا بت عفاريت ايه الله يخيبك ) .. وبعدين مين العفريت الرايق اللى عاوز يشتغلنى ويهزلى الكوباية! ..

وطبعا لما تدبرت الامر اتضح ان كان فيه عربية ( لوري) كانت تسير فى الشارع وهزت العمارة وانا لما كنت مستغرقة فى الكتابة محستش بيها ..وبعدين حكيت الحكاية دى لماما فى التليفون فقعدت تضحك وطلعتلى من الذاكرة شوية حاجات كانت بتحصل زمان .. منها مثلا ان كان منتشر اوى حكاية (الزار) ، فكانت أى واحدة واحدة مثلا إتأخر عليها الخلفة شوية أو تعبانة نفسيا أو جوزها حاله مش ولابد شويتين تروح تعمل له زار ..والزار ده يا جماعة عبارة عن حفلات مسخرة تضرب فيها الطبول وتتعرى فيها النساء وممكن يصل الامر فيها إلى حد إنتهاك الأعراض .. وطبعا المصيبة اللى فوق ده وده هو الشرك بالله عز وجل والذبح للجن ، وطبعا الذبح لغير الله سواء كان لإنس او جن بغرض قضاء الحاجات شرك ..فقضية الذبح دى خطيرة وهى من اعظم العبادات اللى شرعها الله سبحانه وتعالى وجاءت ايات القرأن المعظم تستنكر على المشركين اللى كانوا بيذبحوا للاصنام .. وخطورة الامر ده كمان منتشرعند الناس بتوع زيارة الاضرحة اللى بيذبحوا للولى الفلاني أو العلاني .. وكل ده مخالف للعقيدة الاسلامية اللى للاسف أغلب الناس فى غفلة عنها ...

واحدة صاحبتى بمناسبة حكاوى المصاطب بتاعة العفاريت قالتلى ححكيلك حكاية غريبة اوى ، قولتها احكى يا ستى ، قالتلى جدى مرة كان عائد من الشغل بالليل اوى وزمان بالليل مكنش زى دلوقت ، زمان بالليل مكنتيش تسمعى صوت صريخ بن يومين ..قولتلها ها وبعدين طلعله حرامي ؟ّ! قالتلى لا ..قولتلها عسكرى الدرك مسكه مثلا ؟ قالتلى ياريت ..قولتلها أمال ايه بأه ؟! ..قالتلى طلعله عفريت !! .. طبعا سمعت الكلمة دى وهاتك يا ضحك حوالى خمس دقائق وأنا مش عارفه أمسك نفسي من الضحك ، وصاحبتى تقولى والغريب انه لما يقرب منه يلاقيه بيطول ..بيطول ..بيطول ، قولتلها يا بنتى تلاقيه كان بيحلم وافتكر ان ده حقيقى ، بجد يا جماعة أنت لو فتحت موضوع العفاريت ده فى اى قعدة حتسمع العجب من الشعب المصري ، وللاسف الناس واخدة ثقافتها عن الجن والعفاريت من الكتب الصفراء الموجودة على الأرصفة ، وطبعا كلام زى ده المفروض يتاخد من مصادرة الموثقة الكتاب والسنة .

وبعدين بأه تعرف الكداب منين؟ تلاقيه بيقولك أنا شفت عفريت .. طب العفريت ده شكله ايه بأه ..يقولك ليه قرنين وشكله كذا وقفاه كذا ..الخ ، وطبعا ده كلام مصادم للكتاب والسنة ، شوف مثلا القرأن الكريم بيقول ايه فى سورة الاعراف {يَا بَنِي آدَمَ لاَ يَفْتِنَنَّكُمُ الشَّيْطَانُ كَمَا أَخْرَجَ أَبَوَيْكُم مِّنَ الْجَنَّةِ يَنزِعُ عَنْهُمَا لِبَاسَهُمَا لِيُرِيَهُمَا سَوْءَاتِهِمَا إِنَّهُ يَرَاكُمْ هُوَ وَقَبِيلُهُ مِنْ حَيْثُ لاَ تَرَوْنَهُمْ إِنَّا جَعَلْنَا الشَّيَاطِينَ أَوْلِيَاء لِلَّذِينَ لاَ يُؤْمِنُونَ }الأعراف27 لاحظ قوله تعالى ( إِنَّهُ يَرَاكُمْ هُوَ وَقَبِيلُهُ مِنْ حَيْثُ لاَ تَرَوْنَهُمْ ) فإستحالة إن الانسان يرى شيطان فى صورته الحقيقية ، لكن ممكن ترى شيطان فى صورة كلب أو إنسان أى صورة أخرى غير صورته الحقيقية ..وفى الحالة دى لو قتلته حيموت لانه بياخد طبيعة الصورة المتنكر فيها علشان كده الشياطين- لعنهم الله- بيخافوا من التنكر فى الصور المختلفة لفترة طويلة .. وبعدين لو بصيت على أغلب الحكاوي تلاقى المسألة اشتغالات يعنى العفريت اللى طلع وبيطول ويطول ده على رواية صحبتى ، هل هو متنكر مخصوص علشان يشتغل الراجل ده ! طبعا كلام يفتقر حتى للمنطق .. مسألة (الجن والشياطين) عاوزه دراسة فعلا جادة قائمة على الكتاب والسنة وللأسف مثل هذه الدراسات نادرة وأغلب الكتب المتوفرة دلوقت فيها من المبالغات الكتير والخرافات الاكتر ..

وللاسف فى ظل ثقافة الجهل المسيطرة على عقول شعبنا وعدم القراءة الدينية سهل اوى إن اى خزعبلات او غيرها انها تسيطر على عقولهم.. من ثلاثة ايام سمعت واحدة فى الشارع لا اعرفها تنصح صديقتها بتعليق خرزة زرقاء فى بيتها .. بالله عليكم ده كلام يتقبله عقل سليم ! يعنى خرزة زرقاء حتعملك ايه ! حتحميك من الجن ولا حتحميك من الحسد ! ده فضلا على ان الكلام ده شرك زى ما قولنا ... لان الحماية والمدد لا تطلب إلا من الله تبارك وتعالى ، وتلاقى واحدة ولا واحد لما يكلمك عن الجن يقولك (اشتاتا اشوت) ايه اشتاتا اشتوت دى! وايه الكلام الغبى ده اللى ملهوش معنى ..!. فين الاستعاذة بالله سبحانه وتعالى وطلب الحماية منه! ، شوف ربنا سبحانه وتعالى بيقول {وَقُل رَّبِّ أَعُوذُ بِكَ مِنْ هَمَزَاتِ الشَّيَاطِينِ }المؤمنون97 ، هو ده العلاج والحماية لا خرزة صفراء ولا زرقة ولا نيله ولا اى خزعبلات من هذا النوع ، ولذلك يا جماعة أهم شىء واهم إستفادة انا عاوزه أوصلها من خلال هذا الموضوع ، أولا: معرفة ديننا معرفة جيدة وقراءة العقيدة الاسلامية لناس موثوق فى علمهم وفضلهم وده اللى بنصح به علطول ولما سألتنى عضوه هنا فى المنتدى ازاى تكون مثقفة قولتلها قبل كل شىء لازم القراءة فى العقيدة الاسلامية ، قبل السياسية وقبل التاريخ وقبل اى حاجه لازم تكون على إطلاع جيد على العقيدة الاسلامية ، ثانيا: عدم الانخداع بأغلب الكتب اللى بتتكلم عن الجن والعفاريت وأى حد يقولك حاجه عنهم تسأله سؤال واحد بس ايه دليلك من الكتاب والسنة ؟ لو اعطاك اية قرأنية أو حديث صحيح كان بها ، أما لو معندوش دليل يبقى كلامه يخليه لنفسه .

[size=16]
انتو
وجهة نظركم اية فى الموضوع دة
[/size]

Admin عدد الرسائل : 1219 تاريخ التسجيل : 01/06/2008

اشتاتا أشتوت

ياموضوع عدي وفوت

ياما بسببك ناس بتموت

ياما بسببك ناس مش لاقية القوت

ياما بسببك ناس مساكين انضربت بالنبوت

والله ياحنين

موضوعك يستجلب لي الآنين

مش عارف صراحه نبدأ منين

ولكن ربنا هو المعين

على اننا نتغلب على هؤلاء الدجالين

مشكوره لفتحك هذا الموضوع ياحنين

ولباقي اراء الاعضاء المحترمين ادينا منتظرين

علوه

أشتاتا أشتووووووووت
وحكاوى فى سنين بتلف وتدور
أدى جنى ..أدى عفروتو
لأ والمارد اوعى وحوش
ستى وستك والمبروك
وعالمصطبه كله مقبول

يالا ندور تحت الصخر
يالا الموضوع محتاج صبر
ارمى بياضك واملى جيوبك
ده المبروك هيمحى همومك

اجرى وحضر المطلوب
عاوزين ديك أخضر ويتيم
واوعى تنسى عين العفريت
لأ والخاتم حاضر جاى
كله عشان خاطر الأسياد

خلاص أهو لاح السر وبان
أم زينات مش بالعه حياه
أصلها حلوه وبنت حلال
يبئ نحوش عنها العين
وجنب مامتها تفضل فى البيت
يالا ياشيخنا يامبروك
اعملنا العمل المعهود
وهنرميه فى بطن القرموط

وأدى صفاء جالها صداع
عطست عطسه قالت اه
يالا ياجارتى شورى عليا
طيب يختى هى حبيبه
خالتى وخالتك ايدها خفيفه
بس لازملها كام مشوار
لأجل لزوم قاعده الزار
قولى لجوزك كوافير خياط
كذبه تفوت ولا أى خراب

دى بيضه وحجر
وشياطين من جنس البشر
فوقوا ياناس من دى الغفله
قبل ما ييجى وقت الزحمه

غفله ونووووووم
كله يفووووووق
خافوا الله
شوفوا القرأن
راحه لكل عقل محتار
هى عقيده حلوه متينه
ليه نهدمها كده بادينا
اركع واسجد وقول يارحيم
يافعال لما يريد
عبدك لجألك وعنده يقين
ملوش غيرك يارب معين

اللهم ياغنى ياحميد

يامبدئ يامعين

يارحيم ياودود

ياذا العرش المجيد

يافعال لما يريد

أكفنى بحلالك عن حرامك

وبطاعتك عن معصيتك

وأغننى بفضلك ياربى

عن من سواك

ميرسى جدا جدا لمروركم الكريم ونورتونى بتعليقاتكم الرائعة
دمتم بود اخوانى الاعزاء